Бишкек шаарында өткөн B5+1 форумунун биринчи күнүндө AmCham Kyrgyz Republic уюмунун Аткаруучу директору Алтынай Асанова «Отраслевая сессия II: Туризм боюнча B5+1 регионалдык ишкердик күн тартиби» аттуу панелдик талкууга катышты.

Өз сөзүндө ал эл аралык жана америкалык бизнес үчүн туризмге инвестиция салуу чечимдери дестинациянын потенциалына эмес, ишкердик чөйрөнүн алдын ала божомолдонушуна, түшүнүктүү жана айкын эрежелерге, ошондой эле рыноктун масштабына көбүрөөк көз каранды экенин белгиледи.

Инвестицияларды көбөйтүү үчүн өтө маанилүү болгон негизги факторлор катары төмөнкүлөр белгиленди:
— жөнгө салуучу туруктуулук жана инвесторлордун укуктарын коргоо;
— процедураларды жөнөкөйлөтүү жана административдик тоскоолдуктарды азайтуу;
— Борбор Азияны туризм жана инвестициялык долбоорлор үчүн бирдиктүү регионалдык рынок катары кабыл алуу.

Алтынай Асанова ошондой эле B5+1 форматынын жана AmCham тармагынын бизнес-коомчулуктун позициясын бириктирүү жана Борбор Азиянын туристтик секторунун инвестициялык жагымдуулугун жогорулатууга багытталган регионалдык демилгелерди илгерилетүү үчүн практикалык платформа катары маанилүү ролун баса белгиледи.

Бүгүнкү күндө туризм Борбор Азиянын экономикасында эң динамикалуу өнүгүп жаткан тармактардын бири болуп саналат, айрыкча пандемиядан кийинки мезгилде. Жергиликтүү жана регионалдык туроператорлор жаңы туристтик өнүмдөрдү активдүү иштеп чыгышууда, ал эми тармак туруктуу өсүш үчүн олуттуу потенциалга ээ.