Кыргыз Республикасындагы Америкалык Соода Палатасы

БИЗ ТУУРАЛУУ

Кыргыз Республикасындагы Америкалык Соода Палатасы (AmCham) – Кыргызстанда жагымдуу жана атаандаштыкка жөндөмдүү бизнес чөйрө түзүүгө умтулган алдыңкы эл аралык бизнес-ассоциация. AmCham эл аралык майданда жергиликтүү бизнестин, ошондой эле Кыргызстандагы чет өлкөлүк компаниялардын кызыкчылыктарын көздөө менен, 90тан ашуун компания менен иш жүргүзөт. Өз ишмердигин жүзөгө ашырууда өз ара пайдалуу чечимдерге жетүү үчүн AmCham ишкерлер, саясатчылар жана инвесторлор отосунда байланыштыруучу звено ролун аткарат.

2005-жылы негизделген Палата U.S. Chamber of Commerce аттуу ири эл аралык бизнес уюмга кирет. U.S. Chamber of Commerce – 3 миллиондон ашык компаниянын кызыкчылыктарын көздөйт.

AmCham глобалдык түйүнү

AmCham кандай иштерди аткарат?

AmCham Палата мүчөлөрүнүн кызыкчылыктарын илгерилетүү жана Кыргыз Республикасында бизнести өнүктүрүү үчүн жагымдуу шарттарды түзүү боюнча жигердүү иштерди жасайт. Ай сайын миңдеген инвесторлор уюмдун расмий сайтынан AmCham’га мүчө компаниялар тууралуу маалыматтарды алып турушат. AmCham Кыргыз Республикасынын мамлекеттик органдары жана бизнес-структуралар менен тыгыз кызматташып, өлкөдө бизнес чөйрөнү өнүктүрүүгө умтулат.

 

Бизнес кызыкчылыгы үчүн иш-чараларды уюштуруу

AmCham өткөргөн иш-чаралар компанияларга өз кызыкчылыктарын мамлекеттик деңгээлде илгерилетүү, маселелердин өз пайдасына чечилишине таасир тийгизүү мүмкүнчүлүгүн берет.

  1. бизнес-форумдар, тегерек стол талкуулары, конференциялар;
  2. бизнес үчүн актуалдуу темаларда эксперттердин катышуусунда практикалык семинарлар жана тренингдер;
  3. өкмөт өкүлдөрүнүн, элчилердин, бизнес жамаатынын лидерлеринин  катышуусу менен бизнес-ланчтар;
  4. семинарлар жана тренингдер.

 

Бизнес-нетворкинг

AmCham мезгил-мезгили менен түрдүү иш-чараларды уюштуруп турат жана мында Палатанын мүчөлөрү өзүнүн байланыш түйүндөрүн кеңейте алышат. Анын ичинде компаниялардын топ-менеджерлери, жетекчилиги менен байланыш түзүп, бизнес өнөктөштөрдү жана инвесторлорду таба алышат. Ошентип Палатанын мүчөлөрү расмий да, бейрасмий да (коктейль жана джаз-кечелери, happy hours ж.б.) жагдайда бизнести өнүктүрүү жаатындагы актуалдуу маселелерди талкуулап алуу мүмкүнчүлүгүнө ээ болушат.

 

Палата мүчөлөрүнүн кызмат көрсөтүүлөрүн жана өнүмдөрүн илгерилетүү

AmCham түрдүү аспаптардын жана каналдардын жардамы менен мүчө-компаниялардын кызмат көрсөтүүлөрүн жана өнүмдөрүн илгерилетүү үчүн натыйжалуу аянтча болуп эсептелет:

  • маалыматтык колдоо көрсөтөт;
  • AmCham өз сайтында компания тууралуу маалыматтарды, логотибин жана соңку жаңылыктарды жайгаштырат;
  • ай сайын чыкчу басылмага компаниянын жаңылыктарын жайгаштырат;
  • Палатанын мүчөлөрүнө жана өнөктөштөрүнө компаниянын жаңылыктарын таратып турат;
  • дисконттук программага катышуу укугун берет – бул болсо кросс-маркетинг үчүн натыйжалуу аспап болуп эсептелет. Дисконттук карта Палатанын мүчөлөрүнүн кызмат көрсөтүүлөрүнө жана өнүмдөрүнө жеңилдик алууга жол берет;
  • жыл сайын чыкчу бизнес-портфолиодо компания тууралуу маалымат жана логотиби жайгаштырылат.

 

Маалыматтык колдоо

AmCham жакынкы жана алыскы мамлекеттердеги кызыкдар инвесторлорго өлкөдөгү келечектүү бизнес долбоорлор тууралуу маалыматтарды берип турат. Ошондой эле компаниянын суроо-талабы боюнча AmCham глобалдык түйүндөгү уюмдар жана бизнес структуралар тууралуу маалыматтар менен бөлүшөт. Бул болсо түрдүү өлкөлөрдө окшош бизнес жүргүзгөн компаниялар ортосундагы кызматташтык үчүн пайдалуу.

 

Визалык колдоо

Палатанын мүчөлөрү АКШга бизнес виза алгысы келсе, аларга колдоо каты берилет. Бул үчүн сиз Кыргыз Республикасындагы Америкалык Соода Палатанын кызматкерлерине кайрылышыңыз керек. (AMCHAM’га МҮЧӨ БОЛУУ дегенди басыңыз)

Миссиябыз

AmCham’дын миссиясы – өлкөдөгү бизнес климаттын, ошондой эле Кыргызстандагы бизнес компаниялар менен эл аралык жамаат ортосундагы өз ара мамилелердин жакшыруусуна көмөктөшүү. AmCham’га мүчө компаниялар – биздин башкы активибиз. Биз алар үчүн конструктивдүү чечимдерди издеп, алардын кызыкчылыктарын коргоп жана көздөп, өнүгүү мүмкүнчүлүктөрүн камсыздап, Кыргызстанда бизнестин жана экономиканын өнүгүүсүнө көмөктөшөбүз. Биз бардык жергиликтүү мыйзамдарды сактап, өз ара мамилелерде жана бүтүмдөрдө эң жогорку этикалык стандарттарды талап кылып, өлкөгө карата сый мамиле жасоо менен өз миссиябызды аткарып келатабыз.

Аткаруучу директордун кайрылуусу

Кадырлуу достор,

Сиздер менен Кыргыз Республикасындагы Америкалык соода палатасынын атынан саламдашуудамын. Кыргыз Республикасындагы Америкалык соода палатасы дүйнө жүзү боюнча AmCham глобалдык түйүндүн бир бөлүгү болуп эсептелет жана жергиликтүү да, чет өлкөлүк да инвесторлордун бизнес жамаатын чагылдырат.

Биздин эл аралык бизнес-ассоциациябыз Кыргызстанда 10 жылдан ашык убакыттан бери иш алып барууда. Бул мезгил аралыгында Кыргызстандагы бизнести өнүктүрүү үчүн бир топ иштер жасалды. Бирок алдыда өлкөдөгү бизнес-климатты жакшыртуу, башка өлкөлөр менен бекем өз ара ишкер мамилелерди түзүү жана Кыргызстан экономикасы күчтүү, туруктуу мамлекет катары өнүгүүсү үчүн дагы бир топ стратегиялык жактан маанилүү маселелерди чечүү зарыл.

Биздин эл аралык ассоциациябыз дал ушул максаттарга жетүүгө умтулуп келатат. Бизнес-форумдар, тегерек столдогу талкуулар, бизнес-ланчтар, ай сайын бейформал жагдайда өтүп турчу социалдык жолугушуулар өңдүү биз өткөргөн иш-чаралар, ошондой эле ай сайын жарык көргөн Палатанын “Business Insight” басылмасы өлкөдөгү инвестициялык климатты жакшыртууга, ошондой эле бизнестин кызыкчылыктарын жергиликтүү да, эл аралык да деңгээлдерде илгерилетүүгө багытталган. Палата Кыргызстандын экономикалык өнүгүүсүнө шарт түзгөн жалпы максаттарга жетүү үчүн бизнес менен өкмөт ортосунда конструктивдүү диалог түзүүгө өзгөчө көңүл бурат.

Бүгүнкү күндө Кыргызстандагы Америкалык соода палатасына чакан, орто жана ири бизнести камтыган 90дон ашуун компания мүчө. Алардын ичинде финансы мекемелери, тоо-кен компаниялары, уюлдук операторлор, FMCG-компаниялар, консалтинг фирмалары, жарнама агенттиктери жана башкалар бар. Ушундай түрдүү секторлорду өзүбүзгө тартуу менен, жалпысынан бизнес чөйрөнү өнүктүрүүдө ар кандай пландагы тапшырмаларды натыйжалуу аткарып келатабыз.

Мында биздин уюм кандай ролду ойноп жатат деп сурашыңыз мүмкүн. Биз бизнес, мамлекеттик органдар жана эл аралык бизнес жамаат ортосунда байланыштыруучу звено милдетин аткарып, актуалдуу маселелерди талкуулоо жана аларды чечүү үчүн аянтча түзүп берүүдөбүз. Мындан тышкары биз зарыл ресурстарга, маалыматтарга жол ачып, катышуучуларыбыздын идеяларына жана жаңылык киргизүү аракеттерине дайыма ачыкпыз. Биз өнөктөш жана инвестор табууга жардам берип, консультациялык кызматтарды көрсөтүп, бизнесиңиздин өнүгүүсүнө таасирин тийгизген актуалдуу маалыматтарды берип турабыз.

Биз бири-бирибиз үчүн пайдалуу болуп, биргелешкен аракеттер менен жаңы бийиктиктерди багындырып, алдыга койгон максаттарга жете алабыз деп ишенем.

 

Аруу тилектерим менен,
Зарина Чекирбаева
Аткаруучу директор

Башкаруу жана персонал

Директорлор кеңеши

Кыргызстан тууралуу

Кыргыз Республикасы – калкынын саны 5 миллион кишиден ашкан, Борбор Азияда жайгашкан мамлекет. Кыргызстан электр энергиясын, пахтаны, алтынды, этти, тамекини, тигилген буюмдарды, сымапты, уранды, жүндү экспорттойт. Өлкөдө тоо-кен тармагы жана тигүү өндүрүшү өнүккөн. Экономикалык эркиндиктин деңгээли боюнча өлкөлөрдүн 2015-жылдагы рейтингине ылайык, Кыргызстан “орточо эркин өлкө” категориясына кирип, 82-орунда турат. Борбор Азия боюнча алып караганда, рейтингде Кыргызстан Казакстан Республикасынан кийинки экинчи орунду ээлейт.

Doing Business-2015 рейтингинде Кыргызстан 102-орунду ээледи. Изилдөөгө ылайык, Кыргызстан “Курулушка уруксат алуу”, “Электр тармактарына кошулуу” жана “Келишимдердин аткарылышын камсыздоо” өңдүү бир нече көрсөткүчтөр боюнча өз позицияларын жакшырта алган.

Улуттук статистика комитетинин маалыматына ылайык, Кыргыз Республикасынын тышкы соода жүгүртүүсү 2015-жылдын алгачкы жарым жылдыгында 2 миллиард 707 миллион доллардан ашкан. Экспорттун үлүшү 26,3%, импорт болсо 73,7% түзгөн.

Биздин жетишкендиктер

Биздин өнөктөштөр

US Embassy
USAID
ТПП КР
Royal Embassy of Saudi Arabia
Republic of Turkey – Embassy
НАБА
Герб Кыргызстана
Investment Council
Международный деловой совет
Embassy of Swidzerland
Deloitte
Бизнес Ассоциация ЖИА
British Embassy

Америкалык соода палатасынын мүчөсү болгуңуз келеби?